Ana səhifə Planet |
Rusiyanın gizli şəkildə Liviyanın devrilmiş lideri Müəmmar Qəzzafinin oğlu Seyfülislam Qəzzafini ölkə rəhbərliyinə gətirməyə çalışdığı iddia edilib.
Axar.az Teleqraf.com-a istinadla xəbər verir ki, “Blumberq” keçən ilin aprel ayında iki rus kəşfiyyatçının bu məqsədlə Qəzzafinin oğlu ilə görüşdüyünü yazıb.
İddiaya görə, Kəşfiyyatçıların paytaxt Tripolidə saxlanılmasından sonra ələ keçən məxfi sənədlər Rusiyanın Şimali Afrikanın neftlə zəngin ölkələri üzərindən Liviyada öz nüfuz dairəsini hansı formada genişləndirdiyinə dair gizli planlarını deşifrə edir.
Burada Moskvanın əsas tərəfdaşı da məhz oğul Qəzzafidir:
“Rusiya cidd-cəhdlə yenidən Liviyada devrilmiş Qəzzafi rejimini bərpa etməyə çalışır. Artıq uzun illərdir vətəndaş müharibəsi içində olan Liviyada Qəzzafi nostalgiyası baş qaldırıb və Seyfülislam Liviyanın ən məşhur siyasətçilərindən birinə çevrilib”, - məqalədə bildirilib.
Məqalədə Seyfülislam Qəzzafinin ön plana çıxarılması təklifinin “Putinin aşpazı” adı ilə tanınan və Liviyada qiyamçı general Xəlifə Haftara dəstək verən “Vaqner” xüsusi təhlükəsizlik şirkətinin başçısı Yevgeni Priqojindən gəldiyi bildirilib.
Məlumatda, eyni zamanda, Seyfülislamın da Rusiyadan kömək gözlədiyi, bu məqsədlə seçilmiş şəxslərin Tunisdə oğul Qəzzafi üçün müşavir kimi yetişdirilməsi və sosial şəbəkələrdə onu dəstəkləyəcək xüsusi kampaniyanın başladılmasının planlaşdırıldığı qeyd edilib.
İddiaya görə, Rusiya hakimiyyəti kəşfiyyat vasitəsilə “Liviyanın yenidən dirçəlməsi strategiyası” adlı planı artıq oğul Qəzzafiyə təqdim edib. Sənəddə Seyfülislamın Liviyanın yeni lideri üçün ya namizəd olması, ya da Rusiya tərəfindən irəli sürülən hansısa bir namizədə dəstək verməsi kimi faktorlar yer alıb.
Məqalədə Seyfülislam Qəzzafi ilə görüşən rus kəşfiyatçıların hələ də Tripolidəki həbsxanalardan birində saxlanıldığı iddia olunub.
Tarix
2020.03.21 / 14:19
|
Müəllif
Axar.az
|