"Tsarukyan Sərkisyanın tənqidçisi kimi tanınırdı və son zamanlar etiraz nümayişlərinə çağırışları ilə populyar idi".

Axar.az xəbər verir ki, Ermənistan parlamentinin sayca ikinci fraksiyası və 400 min nəfərə qədər üzvü olan Firavan Ermənistan Partiyasının sədri Qaqik Tsarukyan haqda ekspertlər bu fikirləri səsləndirib. Siyasətdən gedən ölkənin ən varlı adamlarından birinin yerinə partiyanın parlament fraksiyasının katibi Naira Zohrabyan təklif edilib.

2004-cü ildə təsis olunan Firavan Ermənistan Partiyası Robert Köçəryan hakimiyyətində hakim koalisiya üzvü olub, Serj Sərkisyan hakimiyyəti dövründə, 2012-ci ildə koalisiyadan çıxıb və özünü alternativ qüvvə elan edib. Partiyanın ölkə ərazisində, bütün rayon və kəndlərdə fəaliyyət göstərən bölmələrinin taleyi və ümumiyyətlə, partiyanın maliyyə problemlərinin həlli məsələləri də suallar doğurur. Bu günədək bu problemləri Qaqik Tsarukyan həll edirdi. Bundan başqa, partiya vaxtilə Robert Köçəryanın himayəsi ilə təsis edilib. Bir çoxları müəyyən karyera və şəxsi bizneslərinin müdafiəsi maraqları ilə Firavan Ermənistana üzv olublar.

Artıq 7 millət vəkili FEP fraksiyasını tərk edib, partiya sıralarının kütləvi surətdə tərk edilməsi də istisna olunmur.

Bu gün sabiq xarici işlər naziri Vardan Oskanyan da FEP-dən çıxmaq ərizəsini təqdim etdiyini bəyan edib.

Sərkisyan fevralın 12-də Tsarukyanı kəskin tənqid edib, onun bir siyasi xadim kim ölkə üçün bəla olduğunu bəyan edib.