2020.04.02. 23:13

Dünya üzrə koronavirusa (COVİD-19) yoluxanların sayı 1 milyonu ötüb.

Axar.az xəbər verir ki, ən son məlumata görə, bu virusa yoluxanların sayı 1 milyon 7 min 436 nəfərə çatıb.

Bu virusdan 51.712 nəfər ölüb, 210.582 nəfər isə sağalıb.

Ən çox yoluxma ABŞ-da müşahidə edilir. Bu ölkədə son sutkada 25.321 nəfər bu virusa yoluxub və ümumilikdə yoluxma 240.344 nəfərə çatıb. ABŞ-da son sutkada 705 nəfər (ümumilikdə 5.807) koronavirusdan ölüb.

İtaliya ölü sayına görə birinci yerdədir. Bu ölkədə 115.242 nəfər yoluxub, onlardan 13.915 nəfər (son sutkada 760) ölüb.

Ölü sayına görə ikinci yerdə İspaniya gəlir. Bu ölkədə yoluxma 110.238 nəfər, ölüm isə 10.096 (son sutkada 709) nəfərdir.

Almaniya yoluxma sayına görə 4-cü yerə qalxıb - 84.688. Son sutkada 173 nəfər (ümumilikdə 1.104) ölüb.

Çin 81.589 yoluxma ilə 5-ci yerə geriləyib və bu ölkədə son günlər yoluxmanın qarşısının alındığı şübhə doğurmur. Çində son sutkada 6 nəfər (ümumilikdə 3.318) bu virusdan ölüb.

Fransa 59.105 yoluxma ilə 6-cı, İran 50.468 yoluxma ilə 7-ci sıradadır. Fransada son sutkada bu virusdan 471 nəfər (ümumilikdə 4.503), İranda 124 nəfər (ümumilikdə 3.160) həyatını itirib.

Qardaş Türkiyə də yoluxma sayına görə, təəssüf ki, ilk onluğa daxil olub. Türkiyədə 18.135 nəfər yoluxub, 356 nəfər dünyasını dəyişib (son sutkada 79 nəfər).