Rusiya Prezidenti Qarabağın və ona bitişik bölgələrin hamısının Azərbaycan ərazisi olduğunu söyləyərək, “qaranlıq” qalan məqamlara aydınlıq gətirdi. Kim nə deyirsə desin, amma o (Putin — red.), haqlıdır.

Axar.az xəbər verir ki, bu barədə erməni siyasi müşahidəçi Romella Mnatsakanyan yazıb.

Mnatsakanyan qeyd edib ki, bu əraziləri məskunlaşdıraraq insanlar üçün normal bir həyat qurmaq, müasir bir infrastruktur yaratmaq lazım idi:

“İrəvan isə hər şeyi məhv etmək qərarına gəldi. Planetin ən gözəl yerləri (bir müddət öncəyə qədər işğal altında olmuş Azərbaycan torpaqları - red.) ermənilər tərəfindən xarabaya çevrildi. Hazırda biz Qarabağın tamamilə itirildiyi və İrəvanın vətəndaş müharibəsi astanasında olduğu şəraitdə hakimiyyət uğrunda mübarizəni müşahidə edirik.

Ermənistanda onsuz da miqyasdan kənar qarşılıqlı nifrət dərəcəsi bütün çərçivələri aşır. Eyni zamanda, nə iqtidar, nə də müxalifət xalqımızı bütün bu bəlalardan necə xilas etmək barədə aydın bir anlayışa sahibdir. Biz belə yaşayırıq — Putini və bugünkü Rusiyanı lənətləyərək, lakin daha çox lənətə Robert Köçəryanın, Serj Sərkisyanın, Nikol Paşinyanın və Artur Vanetsyanın layiq olduğunu dərk edərək”.