Ana səhifə Planet |
Əgər Baş Qərargah öz mövqeyini dəyişməsə, Baş nazir Nikol Paşinyan ölkədən qaçmağa məcbur olacaq.
Axar.az xəbər verir ki, bu sözləri politoloq Armen Bədəlyan Baş Qərargahın istefa tələbi və Nikol Paşinyanın xalqı meydanlara çağırması haqda danışarkən deyib.
“Bəyanatı təkcə Baş Qərargah deyil, bütün korpus rəhbərləri imzalayıb. Bu isə o deməkdir ki, bütün ordu hakimiyyətə qarşıdır. Hətta əgər Paşinyan öz tərəfdarlarına silah paylasa, yenə orduya qarşı müqavimət göstərə bilməyəcək”, - o bildirib.
Bədəlyanın sözlərinə görə, Paşinyan heç nə edə bilməyən deputatları, polisi və qvardiyası ilə məsləhətləşir:
“Onların içərisində də Paşinyanı tam dəstəkləməyənlər var. Onlar indiki hakimiyyəti öz həyatları bahasına müdafiə etməyəcək. O ki qaldı sıravi vətəndaşlara, Paşinyan başa düşür ki, onlar orduya qarşı durmaq və hakimiyyəti qorumaq hayında deyil”.
Ekspert Paşinyan tərəfdarları ilə xırda toqquşmaları da istisna etməyib:
“Əgər şəhərə ordu girsə, hamı qaçacaq, o cümlədən Paşinyanın tərəfdarları da. Onlar əlbəttə ki, ölümsüz deyillər”.
Bədəlyanın fikrincə, hakimiyyət güc yolunu seçsə, Onik Qasparyan hərbi çevrilişə qərar verəcək, bu isə Paşinyan üçün çox pis ssenaridir:
“Bu, Baş Qərargahın birdən-birə, qəfil qərarı deyil. Bu bəyanatın əvvəlcədən planlaşdırıldığı istisna deyil”.
Qeyd edək ki, az öncə Baş Qərargah Paşinyanın istefasını tələb edən bəyanat yayıb. Bunun ardınca Paşinyan Baş Qərargah rəisi Qasparyanı və birinci müavinini istefaya göndərib, tərəfdarlarını isə meydanlara çağırıb.
Tarix
2021.02.25 / 13:20
|
Müəllif
Axar.az
|