İraqda qaçırılan 16 türk işçisi Ankara hava limanına çatıb.

Axar.az-ın yaydığı məlumata görə, 28 gün girovluqda olan işçilər özəl təyyarə ilə Türkiyəyə gətirilib.

Onları Baş nazirin köməkçisi Yalçın Akdoğan, Ankara valisi Mehmet Kılıçlar və digər rəsmilər qarşılayıb. Onların yaxınları göz yaşları içərisində əsirlikdən azad olanları gözləyib.

Ayşə Uzun adlı qızın atasını ona qovuşduran təyyarəni görəndə "ata" deyə qışqırması hər kəsin qanını dondurub. Azyaşlı qız göz yaşları içində atası Mehmet Uzunu qucaqlayıb. Daha sonra işçilər Prezident Sarayına aparılıb. Onların Tayyib Ərdoğan tərəfindən qəbul ediləcəyi gözlənilir.

Qeyd edək ki, İraqda silahlılar tərəfindən qaçırılan 18 işçidən ikisi bir müddət qabaq azad edilmişdi. Onları hansı silahlı qruplaşmanın girov götürdüyü açıqlanmayıb.