Əsəd hakimiyyətdən getdikdən sonra Suriyada iqtidara kimin gələcəyi maraqla gözlənilir.

Axar.az xəbər verir ki, dünya mediasında Suriya prezidenti postuna iki ən real namizəd göstərilir. Bunlardan biri, vətəndaş müharibəsi dövründə Milli Şuraya başçılıq edən Muaz Hatib, digəri isə müharibə başladıqdan sonra Əsədlə razılaşmayaraq ölkəni tərk edən general Menaf Talasdır.

Rusiya ilə yaxınlıq…

Suriyada vətəndaş müharibəsi başladıqdan sonra rejimə qarşı mübarizə aparan Milli Koalisiyanın lideri Muaz Hatib Dəməşq hakimiyyətinə ən real namizəddir. Cenevrə yığıncaqlarına qatılan Hatib Avropa Parlamentində dəfələrlə çıxış edib, Rusiya ilə danışıqlar aparıb. Hatibin Suriya müxalifəti arasında böyük nüfuza malik olduğu deyilir.

Muaz Hatib Türkiyə tərəfindən də dəstəklənir. 2012-ci ilin sonunda Prezident Rəcəb Tayyib Ərdoğan Şanlıurfada onu "dünyanın qəbul etdiyi qanuni lider" adlandırmışdı.

Əsədin tələbə yoldaşı

Menaf Talasın da adı Suriyanın gələcəyi ilə bərabər çəkilir. Talas general rütbəsində prezident alayının 105-ci Briqada komandiri olarkən vətəndaş müharibəsi başladıqdan dərhal sonra rejimi sərt tənqid etmişdi. Daha sonra Türkiyəyə qaçan Talas Əhməd Davudoğlu ilə görüşmüş, oradan da Avropaya getmişdi.

Bəşər Əsədin tələbə yoldaşı olan Talas Qərb dəyərlərini mənimsəmiş, Qərb ölkələrinin Suriya prezidenti kimi görmək istədiyi bir şəxsdir.