Çin İran və ərəb ölkələri ilə əlaqələrə bərabər səviyyədə önəm verir.

Axar.az xəbər verir ki, bu sözləri çinli ekspert Yanq Mian Çin hakimiyyətinin son dönəmdəki Yaxın Şərq siyasətini şərh edərkən deyib.

“Səudiyyə Ərəbistanı İranla birbaşa münaqişədədir və BƏƏ-nin İranla ərazi mübahisəsi var. Lakin Çinin Ərəbistan və digər ərəb ölkələri ilə əlaqələri inkişaf etdirməsi İranla münaqişədə onları dəstəkləməsi anlamına gəlmir. İran və körfəz ölkələri arasında gərginlik dönəmində Çin Baş nazirinin müavini Hu Çunhuanın Tehrana səfər etməsi İranla əlaqələri dərinləşdirmək istədiyinin göstəricisidir. Çin və İran ötən il 25 illik strateji əməkdaşlıq razılaşması imzaladı. Bu, Qərbin İrana yönəlik sanksiyalarının təsirini azaltmaq üçün çox önəmlidir. Çin hər zaman Yaxın Şərq ölkəlri ilə dostyana əlaqələrin inkişaf etdirilməsindən yanadır, münaqişəyə daxil olmaz, tərəf bildirməz”, - deyə ekspert bildirib.

Qeyd edək ki, Çin lideri Si Szinpinin Səudiyyə səfəri və Körfəz ölkələri Əməkdaşlıq Şurasınının yekununda İrana qarşı bəyannamə qəbul etməsi İran rəsmi dairələrində narahatlığa səbəb olmuşdu. Belə ki, bəyannamə Hörmüz boğazında İran və BƏƏ arasında ixtilafa səbəb olan üç ada ilə bağlıdır. Sənəddə bildirilir ki, Çin və Körfəz ölkələri problemi dialoq yolu ilə həll etməlidir, belə ki, adalar İran tərəfinin nəzarətində olsa da, hüquqi cəhətdən BƏƏ-yə aiddir.