Dağıstan polisi Mahaçqalada yəhudilərə qarşı münasibəti Fridman soyadlı qadından öyrənib.

Axar.az xəbər verir ki, bu barədə “Baza” Teleqram kanalının ötəngünkü insidentlə bağlı yaydığı məlumatda qeyd olunub.

Kanalın məlumatına görə, dünən günorta saatlarında Fridman soyadlı Moskva sakini Dağıstan polisinə müraciət edib. Qadın bildirib ki, sosial şəbəkələrin Dağıstan seqmentində və Teleqram kanallarında İsrail vətəndaşlarının Dağıstandan qovulması ilə bağlı xeyli çağırışılar var:

“Hava limanına ilk polis qrupu saat 17:00-da (Bakı vaxtı ilə 18:00) göndərilib, lakin saat yarım sonra əraziyə 500-dən çox qəzəbli kütlə toplaşıb və məlum olub ki, polis əməkdaşlarının sayı azdır. Saat 19:00-da bütün şəxsi heyətin toplanışı elan edilib və “Vulkan” əməliyyatına start verilib”.

Kanal bildirib ki, “Red Vings” aviaşirkətinin Təl-Əvivdən uçan təyyarəsi hava limanına saat 19:22-də çatıb:

“Polisin məlumatına görə, bu vaxta qədər 1500-ə yaxın insan hava limanına hücum edib. Etirazçılar inzibati binaya soxularaq, təyyarənin olduğu uçuş-enmə zolağına çıxıblar. Təyyarədə 4-ü İsrail vətəndaşı olmaqla, 50 sərnişin olub. Saat 20:40-da təxminən 70 nəfərlik əlavə polis dəstəsi hava limanına doğru hərəkət edib. Bu zaman etirazçılardan bəziləri hava limanının VİP zalına daxil olub. Saat 22:00-a doğru hücum edənlər polis tərəfindən saxlanılıb. Bu müddət ərzində hava limanına Mahaçqala, Kaspiysk, Buynaksk, İzberbaş və Dərbənddən 500 polis əməkdaşı cəlb olunub. 9 polis əməkdaşı yaralanıb. Alay komandiri Ənvər Mallakurbanov başından aldığı xəsarətlə xəstəxanaya yerləşdirilib”.