Ermənistanın hakim Mülki Müqavilə fraksiyasının deputatı, Xarici əlaqələr daimi komitəsinin sədri Sərkis Xandanyan Ukraynaya səfər edib və Ali Radanın sədri Ruslan Stefançukla görüşüb.

Axar.az xəbər verir ki, bu barədə erməni mediası məlumat yayıb.

Bildirilib ki, Xandanyan ukraynalı həmkarlarına dəstəyini ifadə edib, onların “çətin şəraitdə cəsarətli fəaliyyətini” vurğulayıb və parlamentlərarası platformalarda əməkdaşlığın vacibliyini qeyd edib.

Rəsmi məlumata görə, Xandanyan müharibə qurbanlarının xatirəsini yad etmək üçün Buçaya da səfər edib.

Erməni mediası ABŞ Prezidenti Donald Tramp və Rusiya lideri Vladimir Putin arasında telefon söhbətinin baş tutduğu, Ukrayna üzrə danışıqların başladığı və faktiki olaraq Rusiyanın “Cənubi Qafqaza diqqət ayırma imkanının artdığı” bir vaxtda bu səfəri “təhlükəli və düşünülməmiş” adlandırıb.