Polşanın eks-prezidenti Lex Valensa Polşa Xalq Respublikasının xüsusi xidmət orqanları ilə əməkdaşlıqda ittiham edilir.

Axar.az xəbər verir ki, Polşa mətbuatı, xüsusilə, Polşanın Milli Yaddaş İnstitutunun eks-prezidentin kommunist rejimlə əlaqələrinin olduğunu sübut edən sənədlərə malik olduğunu bildirib. İnstituta sənədlərin 1980-ci illərdə Polşanı idarə edən general Voytsex Yaruzelskinin ən yaxın adamlarından biri olan general ÇeslavKişakın həyat yoldaşı tərəfindən verildiyi qeyd edilib.

Təqdim olunan sənəd 90 səhifəlikdir. Bunun içərisində həmçinin xüsusi xidmət orqanları ilə əməkdaşlığa razılıq verilməsi ilə bağlı zərfdə var. Bu sənədin altında isə "Lex Valensa-Bolek" imzası qoyulub. Bolekə aid tapılan sənədlərin 1970-1976-cı illəri əhatə etdiyi bildirilir.

Qeyd edək ki, Lex Valensa bundan öncə də kommunist rejimin xüsusi xidmət orqanları ilə əməkdaşlıqda ittiham olunub. 2000-ci ildə Polşa məhkəməsi ona qarşı irəli sürülən bütün ittihamları rədd edib.

Valensa 1990-1995-ci ildə Polşa prezidenti olub. O, Polşada kommunist rejimə qarşı mübarizə aparan əsas siyasi xadimlərdən hesab edilirdi. Valensa 1983-cü ildə Nobel sülh mükafatına layiq görülüb.