Rəsmi Bağdad İraqın şimal bölgələrində PKK tərəfdarlarına qarşı ən böyük hərbi əməliyyatın keçirilməsində Ankaraya dəstək verməyə hazırdır.

Axar.az xəbər verir ki, bu barədə “Əş-Şərq əl-Əvsət” qəzeti mənbələrə istinadən məlumat yayıb.

Məlumata görə, bu məsələ ilə bağlı danışıqlar Türkiyə nümayəndə heyətinin Bağdada səfəri zamanı baş tutub:

“İraq Kürd Muxtariyyətinin şimal bölgələrində su və enerji sahəsində razılaşma müqabilində Türkiyə ordusunun Suriyada yaratmaq istədiyinə bənzər 30-40 km enində bufer zonasının yaradılmasına razılıq verib. Söhbət Türkiyənin hərbi bazalarının yerləşdiyi İraq Kürdüstanındakı əraziləri PKK tərəfdarlarının fəaliyyət göstərdiyi bütün sahələri əhatə edəcək təhlükəsizlik kəmərinə çevirməkdən gedir”, - məlumatda deyilir.

Qeyd olunur ki, son üç ayda Türkiyə, İraq və Kürd Muxtariyyəti rəsmiləri Ankaranın 2022-ci ildən “Pəncə-Kilid” əməliyyatını həyata keçirdiyi bölgələrdə keçirilməsi gözlənilən hərbi əməliyyatlarla bağlı məsləhətləşmələr aparıb.