Cümhuriyyət Xalq Partiyasının (CHP) Qaziantepdən olan millət vəkili Akif Ekici Türkiyə Böyük Millət Məclisində (TBMM) prezident Rəcəb Tayyib Ərdoğana qarşı sərt ifadələr işlədib.

Publika.az xəbər verir ki, CHP-çi millət vəkilinin çıxışı parlamentdə qarşıdurma yaradıb.

"Rəcəb Tayyib Ərdoğanın psixoloji müalicəyə ehtiyacı var, çünki şüurunu itirib. Heç biriniz "ey prezident, nə edirsən, ölkəni hara aparırsan" söyləmir", - Akif Ekici deyib.

Ekicinin bu sözlərinə Ədalət və İnkişaf Partiyasının (AKP) millət vəkilləri reaksiya veriblər. AKP-çi millət vəkili Hikmət Nizam ilə Ekicinin əlbəyaxa olmasına digər millət vəkilləri mane olub. Qarşıdurma CHP ilə AKP-dən olan millət vəkillərinin bir-birlərinə söz atmacaları ilə davam edib.

Qeyd edək ki, "Cumhuriyyət" qəzetinin baş redaktoru Can Dündar və həmin qəzetin Ankara təmsilçisi Ərdəm Gülün sərbəst buraxılması prezident Ərdoğanı razı salmayıb. Ərdoğan Konstitusiya Məhkəməsinin qərarını bu şəkildə dəyərləndirib: "Konstitusiya məhkəməsi bu yöndə qərar verə bilər. Mən onların bu qərarına səssiz qalaram. Lakin bu qərara tabe olmuram, hörmət də etmirəm".