Rusiya Prezidenti Vladimir Putinin Gürcüstan vətəndaşları üçün vizasız rejimin genişləndirilməsi haqqında qərarı iki ölkə arasında humanitar münasibətlərin qorunmasına yönəlib.

Axar.az xəbər verir ki, bu fikri jurnalistlərə Kremlin mətbuat katibi Dmitri Peskov bildirib.

Peskovun sözlərinə görə, Rusiyada kifayət qədər böyük gürcü diasporu var. Bundan əlavə, rusiyalı turistlər də Gürcüstana səfər edirlər:

“Dövlətlərarası münasibətlər öz yerində, iki xalq arasında dialoqdan söhbət gedirsə, humanitar münasibətlər də öz yerindədir”.

Qeyd edək ki, V.Putin bu gün Gürcüstan vətəndaşları üçün vizasız rejimi genişləndirən fərman imzalayıb. Sənədə əsasən, vizasız rejim indi Rusiyaya işləmək və ya təhsil almaq üçün 90 gündən çox müddətə gələn Gürcüstan vətəndaşlarına da şamil edilir.