2024.12.01. 19:50

Tiflisdə hökumət əleyhinə yenidən aksiya başladılıb.

Axar.az xəbər verir ki, Gürcüstan və Avropa Birliyi bayraqları ilə hərəkət edən minlərlə insan parlament binası qarşısına, həmçinin Rustaveli prospektinə toplaşıb.

Ərazidə polis qüvvələri mühafizəni gücləndirib. Parlamentə mümkün müdaxilənin qarşısını almaq üçün tədbirlər görülür.

Qeyd edək ki, aksiyalar 28 noyabrda Baş nazir İrakli Kobaxidzenin AB-yə üzvlük danışıqlarının 2028-ci ilə qədər dayandırıldığını elan etməsindən sonra başlayıb. Artıq dördüncü gündür davam edən aksiyalarda polislə toqquşmalar olub, onlarla etirazçı saxlanılıb.

***

Tiflisdə polis qüvvələri parlament qarşısında aksiya iştirakçılarına qarşı su şırnaqlarından istifadə edib.

***

Gürcüstan Daxili İşlər Nazirliyinin xüsusi təyinatlıları Tiflisdə parlament binası qarşısındakı meydanı təmizləməyə başlayıb.

Bildirilib ki, aksiyaçılarla polis arasında hər hansı gərginlik yaşanmır. Etirazçılar sakit formada meydanı boşaldır.