2025-ci ildə əvvəlki dünya nizamının dağılmasının son mərhələsi davam edəcək.

Axar.az xəbər verir ki, bu sözləri rusiyalı politoloq Fyodor Lukyanov 2025-ci il üçün geosiyasi proqnozlarını təqdim edərkən deyib.

Analitik hesab edir ki, Ukraynadakı münaqişə dönüş nöqtəsinə yaxınlaşır:

“Konfliktin forması, demək olar ki, üç ilə yaxındır şahidi olduğumuz konfiqurasiya artıq tükənib və başqa mərhələyə keçməlidir.

Bir neçə mümkün variant var: ola bilsin ki, diplomatik proses başlayacaq. Mən tendensiyaları və inkişafları, o cümlədən Tramp administrasiyasının mövcudluğunu nəzərə alaraq, status-kvonun davam edəcəyini sanmıram”.

Onun sözlərinə görə, geosiyasi mühitdə baş verən prosesləri “Amerika rəhbərliyinə əsaslanan dünya nizamının yıxılması” adlandırmaq olar:

“Tramp və onun komandası Amerikanın siyasi meydanına yenidən baxılmasını və transformasiya edilməsini təklif edib. Bu, təkcə ABŞ-ın xarici deyil, həm də daxili siyasətində və xüsusən kollektiv Qərbin siyasətində nəzərəçarpacaq inkişafları nəzərdə tutur. Prinsiplər, dəyərlər, AB-nin mövcud olduğu əsaslar tükənib, Avropa sarsılır, AB-nin genişlənmə siyasəti Şərqi Avropada işləmir. 2025-ci il Avropa siyasəti baxımından dönüş nöqtəsi olacaq”.

Onun fikrincə, Rusiyanın bu mühitdə siyasətini inkişaf etdirməsi daha asandır:

“Rusiya Ukrayna ilə bağlı bəyan etdiyi prinsiplərdən əl çəkməyəcək. Danışıqların başlayacağı istisna edilmir, təbii ki, bu, hamı üçün daha müsbət ssenari olardı”.