İstanbulun Silivri bölgəsində Mərmərə dənizi təxminən 150 metr geri çəkilib. Dəniz çəkildikcə kiçik adalar ortaya çıxıb. Bölgədə bir müddətdir davam edən yağışlara baxmayaraq dənizin bu qədər çəkilməsi yerli sakinləri narahat edib. Eyni vəziyyət İzmirin Səfərhisar rayonunda da baş verib. Burada dəniz sahildən 200 metrədək çəkilib.

Bəs bu prosesin Egey dənizində bir neçə gündür ardıcıl davam edən zəlzələlərlə əlaqəsi varmı? İstanbul və İzmirdə şiddətli zəlzələlər gözlənilirmi?

Axar.az Türkiyə mediasına istinadən xəbər verir ki, məsələ ilə bağlı açıqlama verən Türkiyə Elmlər Akademiyasının (TÜBA) Ətraf Mühit, Biomüxtəliflik və İqlim Dəyişikliyi üzrə işçi qrupunun üzvü, professor Doğan Yaşar dəniz suyunun çəkilməsinə səbəb şimal küləyinin olduğunu deyib.

“Suyun çəkilməsinə səbəb olan bölgədə əsən şimal küləyidir. Sürəti saatda 60-70 kilometrə çatan güclü külək əsir. Bu külək suyu cənuba, Kritə doğru itələyir. Bu səbəbdən Mərmərə dənizində suyun səviyyəsi azalmağa başlayıb. Bunun Egey dənizində baş verən zəlzələlərlə heç bir əlaqəsi yoxdur. Bu, tamamilə küləklə bağlıdır. Bu, təbii bir hadisədir. Qorxacaq bir şey yoxdur”.

Qeyd edək ki, bu gün səhər saatlarında Egey dənizində ard-arda zəlzələ baş verib.