Bir neçə gün əvvəl Kirman əyalətində saxlanılan Britaniya vətəndaşları Kriq və Lindsi Formenə qarşı casusluq ittihamı irəli sürülüb.

Axar.az xəbər verir ki, bu barədə İran Məhkəməsinin sözçüsü Əsgər Cahangiri məlumat yayıb.

“Britaniya vətəndaşları tədqiqatçı və turist adı altında İrana daxil olub və bir neçə əyalətdə kəşfiyyat məlumatları toplayıblar”, - o iddia edib.

Britaniya Xarici İşlər Nazirliyi məsələ ilə bağlı yaydığı bəyanatda Kriq və Lindsi Formenə qarşı irəli sürülən ittihamlardan dərin narahatlıq keçirdiklərini bildirib.

Britaniyanın “Telegraf” qəzeti isə İranda həbs edilən britaniyalı cütlüyün heç bir cinayət törətmədiyini və İranın onları həbs etməkdən məqsədinin Londondan güzəşt əldə etmək olduğunu yazıb.

Qeyd edək ki, motosikletlə dünya turuna çıxan Kriq və Lindsi Formen İranın Kirman əyalətindən keçdikləri vaxt saxlanılıblar.