İranda Novruz bayramı ərəfəsində şənlik mərasimləri adı altında Qərbi Azərbaycan əyalətinə qarşı yenidən torpaq iddiaları səsləndirilib.

Axar.az xəbər verir ki, bu barədə güneyli fəallar məlumat yayıb.

Məlumata görə, mərasim təşkilatçıları Qərbi Azərbaycan əyalətinin Naxçıvanla sərhəddə yerləşən Poldəşt şəhərini Kürdüstan, bölgə sakinlərini kürd kimi təqdim ediblər.

Azərbaycan torpaqlarına qarşı ərazi iddiası ilə bağlı məlumatlar kürddilli media ilə yanaşı, bəzi farsdilli mediada və Almaniya radiosunun fars bölməsində də əks olunub.

Almaniya radiosunun fars bölməsi Poldəştdə keçirilən tədbiri “İranın kürd bölgələrində bayramqabağı şənlik mərasimləri” başlığı ilə yayıb.

Bununla eyni vaxtda Qərbi Azərbaycan əyalətinin Maku və Bukan şəhərlərində də oxşar tədbirlər keçirilib, ərazi iddiaları irəli sürülüb.

Qərbi Azərbaycan əyalətinin mərkəzi Urmiya şəhəri və başqa yerlərdə də oxşar tədbirlərin keçirilməsi ilə bağlı rəsmi icazə alındığı, qarşıdakı günlərdə geniş tədbirlərin keçiriləcəyi bildirilir.