09:34

Tiflisin mərkəzində nüfuzlu qanuni oğrulardan biri olan Merab Suxumskinin qardaşı və Taqanskaya mütəşəkkil cinayətkar qrupunun lideri olan Levan Canqveladze güllələnib.

Axar.az xəbər verir ki, hadisə ilə bağlı “Shot” Teleqram kanalı məlumat yayıb.

Bildirilib ki, 60 yaşlı Canqveladze ötən axşam Çavçavadze küçəsində səkidə gedərkən qətlə yetirilib. Qatil onu restoranın yaxınlığında bir müddət gözləyib, sonra isə atəş açaraq hadisə yerindən qaçıb. Suxumskinin qardaşına ümumilikdə 9 güllə sıxılıb. Şahidlərin sözlərinə görə, güllələrdən bəziləri yaxınlıqdakı kafenin şüşələrini qırıb.

Gürcüstan DİN-i hadisə ilə bağlı istintaq aparır, şübhəli şəxs hələ saxlanılmayıb.

Məlumata görə, Canqveladze tanışının dəfnində iştirak etmək üçün xaricdən gəlmişdi və şəhərdə mühafizəçilərin müşayiəti ilə hərəkət edirdi. Versiyalardan birinə əsasən, qətl Canqveladze ilə Şakro Molodoy arasındakı münaqişə ilə bağlıdır.

Kanal qeyd edir ki, Levan Canqveladze qardaşı Merab Suxumskinin bütün kriminal müharibələrində iştirak edib, həmçinin onun işlərini, o cümlədən qanuni biznesini idarə edib. Onun adı Yaponçik və Ded Xasan qətlləri ilə əlaqələndirilirdi.