İstanbul Böyükşəhər Bələdiyyəsinə (İBB) qarşı keçirilən kütləvi korrupsiya istintaqı çərçivəsində “Medya” A.Ş. İdarə Heyətinin sədri Murad Ongunun sağ əli və ortağı olduğu iddia edilən Əmrah Bağdadlının ABŞ-a qaçdığı məlum olub.

Axar.az xəbər verir ki, bu barədə Türkiyə mediası məlumat yayıb.

Bildirilib ki, Bağdadlının 2022-2024-cü illərdə öz adına yaratdığı şirkətlər vasitəsilə 60-dan çox tender qazandığı müəyyən edilib. Bundan başqa, onun yanında işləyən 35 nəfərin adına reklam şirkəti qurduğu və tenderləri qazandığı, bu şirkətlərin bir çoxunun eyni ünvanda olduğu bəlli olub.

Bundan başqa, Bağdadlının evində milyonlarla lirə dəyərində saat kolleksiyasının olduğu da vurğulanıb.

Qeyd edək ki, Türkiyə mətbuatı Bağdadlını İBB sədri Əkrəm İmamoğlunun “gizli kassası” kimi təqdim edib.

Xatırladaq ki, ötən gün İstanbul Böyükşəhər Bələdiyyəsində korrupsiyaya qarşı əməliyyat keçirilib. Əməliyyat çərçivəsində İmamoğlu da daxil olmaqla, 106 nəfər saxlanılıb.