Çin diplomatları Avropa Birliyinin Ukraynaya göndərməyi planlaşdırdığı sülhməramlı qüvvələrə qoşulmaq imkanını nəzərdən keçirir.

Axar.az xəbər verir ki, bu barədə "Velt" nəşri yazıb.

Məlumata görə, Pekinin bu təşəbbüsü Rusiyanın sülh prosesinə yaxınlaşmasını hədəfləyir. AB diplomatları da bu amilin vacibliyini vurğulayırlar. Çinli diplomatlar AB-nin bu məsələyə münasibətini öyrənməyə çalışır və ittifaqın belə bir təşəbbüsü dəstəkləyib-dəstəkləməyəcəyini araşdırır.

Brüsseldəki diplomatik dairələr bildiriblər ki, Çinin sülhməramlı qüvvələrə qoşulması Rusiyanın Ukraynada bu qüvvələri qəbuletmə ehtimalını artıra bilər. Lakin məsələ həssasdır, çünki Çin Rusiyanın yaxın müttəfiqi hesab olunur.

Qeyd edək ki, daha öncə Çin sülhməramlı kontingentinin sülh sazişinin icrasına nəzarət etmək üçün Ukraynaya göndərilməsini müzakirə etmək niyyətində olmadığını bəyan edib.