NATO qırıcıları Rusiyanın İl-20M təyyarəsinin Baltik dənizində, Rügen adasının şərqində görünməsi səbəbindən həyəcan siqnalı ilə havaya qaldırılıb.

Axar.az xəbər verir ki, bu barədə “Bild” qəzeti öz mənbələrinə istinadən məlumat yayıb.

Qeyd olunur ki, NATO hava məkanının təhlükəsizliyini təmin etmək üçün Almaniya Hərbi Hava Qüvvələrinə məxsus iki “Tayfun” qırıcısı cümə axşamı saat 09:30-da (Bakı vaxtı ilə 12:30-da) Almaniyanın şimalındakı Lage aviabazasından havaya qalxıb. Alman tərəfinin məlumatına görə, İl-20M təyyarəsi transponderlərini söndürmüş vəziyyətdə uçub və radiobağlantıya çıxmayıb.

Alman qırıcılar Rusiya təyyarəsini bir neçə kilometr müşayiət edib, daha sonra o, Kalininqrad istiqamətinə dönüb.

Rusiya Müdafiə Nazirliyi isə bəyan edib ki, Rusiya hərbi aviasiyasının bütün uçuşları beynəlxalq hava məkanından istifadə qaydalarına tam uyğun şəkildə həyata keçirilir.