Ermənistanın İstintaq Komitəsi türkiyəli bloger Ogun Özdəmirə qarşı hakimiyyəti ələ keçirməyə çağırışlarla bağlı cinayət işi açıb.

Axar.az xəbər verir ki, bu barədə “Sputnik Ermənistan”a Ermənistanın İstintaq Komitəsindən bildirilib.

İstintaq Komitəsi qeyd edib ki, iş açılmasının səbəbi açıq şəkildə hakimiyyəti ələ keçirməyə, ərazi bütövlüyünü pozmağa, suverenlikdən imtinaya və konstitusiya quruluşunu zorla devirməyə çağırışlarla bağlıdır (Ermənistan Cinayət Məcəlləsinin 422-ci maddəsinin 2-ci hissəsinə əsasən).

Xatırladaq ki, bir müddət əvvəl türkiyəli bloger Ogun Özdəmir İrəvanda Respublika meydanından canlı yayım açaraq, Azərbaycan xalqını Novruz bayramı münasibətilə təbrik edib və İrəvanın Azərbaycan şəhəri olduğunu bəyan edib.