Rusiya və ABŞ iki günün yekunlarına əsasən "üç addım irəliləyiblər".

Axar.az xəbər verir ki, bunu Rusiya Prezidentinin xarici ölkələrlə iqtisadi əməkdaşlıq üzrə xüsusi nümayəndəsi Kirill Dmitriyev bildirib.

"Mən deyərdim ki, biz bu gün və dünən çoxsaylı məsələlər üzrə üç addım irəlilədik", - deyə Dmitriyev vurğulayıb.

Onun sözlərinə görə, çox suallar toplanıb – faktiki olaraq üç il ərzində Rusiya və ABŞ arasında heç bir kommunikasiya olmayıb.

"Ona görə də dialoq prosesi, məsələlərin həlli müəyyən vaxt tələb edəcək, lakin bu proses tamamilə pozitiv və konstruktiv şəkildə gedir", - deyə Dmitriyev söyləyib.

Qeyd edək ki, Kirill Dmitriyev ötən gün Vaşinqtonda ABŞ Prezidentinin xüsusi nümayəndəsi Stiven Uitkoffla danışıqlar aparıb.