Ukrayna Müdafiə Qüvvələrinin Kursk və Belqorod vilayətlərində mövcudluğu üç əsas məqsəd daşıyır – hərbi, siyasi və psixoloji.

Axar.az xəbər verir ki, bunu Ukrayna Silahlı Qüvvələrinin Quru Qoşunları Ehtiyat Şurasının sədri İvan Timoçko deyib.

“Bu, vaxtilə Rusiyanı xeyli kiçik olan İçkeriyaya güzəştə getməyə məcbur edən amildir. İçkeriya təşəbbüs göstərdi və öz ərazilərindən kənara çıxaraq Rusiyanın dərinliklərinə daxil oldu. Bu, ilk dəfə olaraq rus komandanlığını sülh sazişlərinə getməyə vadar etdi. Bizim tədbirlərimiz və Rusiya ərazisindəki mövcudluğumuz Rusiya haqqında yaradılmış “məğlubedilməzlik” və Putinin hər şeyi nəzarətdə saxlaya bilməsi kimi narrativi darmadağın edir. Bu isə beynəlxalq danışıqlarda kifayət qədər güclü mövqe tutmağa imkan verir”, – deyə Timoçko bildirib.

O, həmçinin əlavə edib ki, Rusiya bir daha Xarkov və Sum vilayətlərinə hücuma keçmək istəyir. Lakin Ukrayna Müdafiə Qüvvələrinin Rusiya ərazisində mövcudluğu işğalçıların planlarını pozur:

“Onlar əsgərlərini bu istiqamətlərdə saxlamağa məcburdurlar, çünki bizdən onlar üçün potensial təhlükə mövcuddur. Ona görə də indi biz diqqətlə izləyəcəyik ki, onlar harada hücuma hazırlaşırlar və hücuma keçə bilərlər. Biz isə az sayda qüvvə ilə onların ordusunu öz ərazilərində cəmləşməyə məcbur edəcəyik”.