Polşa Rusiyanı Varşavanın ən böyük ticarət mərkəzlərindən biri olan "Marywilska 44"ün məhv edilməsində ittiham edib.

Axar.az xəbər verir ki, bu barədə Polşanın Baş naziri Donald Tusk X şəbəkəsində yanğının ildönümü ərəfəsində yazıb.

O bildirib ki, yanğını bir qrup şəxs Rusiya xüsusi xidmət orqanlarının sifarişi ilə törədib:

"İndi dəqiq məlumdur ki, Varşavadakı "Maryvilska" ticarət mərkəzindəki böyük yanğın Rusiya xüsusi xidmət orqanlarının sifarişi ilə törədilib. Hadisəni törədənlərin bəziləri artıq saxlanılıb, qalanların hamısı müəyyən edilib və axtarışa verilib. Hamınızı tapacağıq!"

Qeyd edək ki, ötən ilin mayın 12-də ticarət mərkəzinin demək olar ki, 80 faizi, mağazalar, eləcə də digər obyektlər yanaraq yararsız hala düşüb.