İran-Ermənistan ticarət zonasında Mehri-Norduz keçid məntəqəsi yaxınlığında mal daşıyan erməni sürücülər vəhşicəsinə döyülüb.

Axar.az xəbər verir ki, bu barədə erməni mediası məlumat yayıb.

Sürücülərdən biri Armen Mnatsakanyan erməni mediasına deyib ki, İran vətəndaşları onlara yaxınlaşaraq, dizel yanacağı almağı təklif edib və onu almasalar, yükün içinə narkotik atacaqları ilə hədələyiblər. Erməni sürücülər bundan imtina etdikdə onları döyüblər:

“Əvvəl dizel almadığım üçün məni döyməyə başladılar, sonra köməyə gələn dostumu da döydülər. Onu şlanqla vururdular. Üstəlik, yük maşını o qədər zədələnib ki, onu idarə etmək mümkün deyil. Deyirlər, maşınlarınıza narkotik atarıq, bizi söyürlər, təhqir edirlər”.

Digər döyülən sürücü Lernik Nazaryan deyib ki, bu, birinci hal deyil, iranlılar mütəmadi olaraq erməni sürücülərə hücum edir.

Sürücülər onu da qeyd ediblər ki, İran hüquq-mühafizə orqanlarının əməkdaşları hadisə yerindədir.