Rusiya işğalçıları artıq pilotsuz uçuş aparatlarını (PUA) kütləvi şəkildə tətbiq etməyə başlayıblar. Onlar bir il əvvəllə müqayisədə daha çox PUA-dan istifadə edirlər.

Axar.az xəbər verir ki, bu barədə ukraynalı keçmiş deputat və hərbçi Yeqor Firsov bildirib.

“Bunu etiraf etmək istəmirəm, amma düşmən dronlardan istifadə sahəsində xeyli irəliləyib. Əgər əvvəllər bu yalnız bir neçə bölmədə müşahidə olunurdusa, indi hər şey geniş miqyasda həyata keçirilir”, – deyə o qeyd edib.

Firsov vurğulayıb ki, Ukrayna sensorları havada çox sayda dron qeydə alır. Üstəlik, ruslar PUA-ları daha yaxşı idarə etməyi öyrəniblər:

“Əvvəllər biz düşmənin videolarına qoşulanda onların necə qəribə və gülməli şəkildə uçduqlarına baxıb gülürdük. Hərəkətləri xaotik idi və cəmi bir neçə kilometr məsafəni əhatə edirdi. İndi isə düşmənin sistemli uçuşları 10-15 kilometr dərinliyə qədər həyata keçirilir – bu artıq reallıqdır. Burada 1-2 uçuşdan söhbət getmir, söhbət PUA “sürüləri”ndən gedir ki, onlar sistemli şəkildə 10-15 km dərinliyə qədər hücumlar təşkil edirlər”.

Firsov əlavə edib ki, ruslar həmçinin radioelektron mübarizə vasitələrinin tətbiqində də irəliləyiş əldə ediblər. Bununla belə, ukraynalı hərbçilər onların da qarşısını almağı öyrənib.