Rusiya bu gecə Ukraynaya dron və raketlərlə güclü zərbələr endirib.

Axar.az xəbər verir ki, bu barədə Ukrayna Fövqəladə Hallar Nazirliyi məlumat yayıb.

Zərbələr nəticəsində çoxlu dağıntılar baş verib, ölən və yaralananlar var.

Kiyev vilayətinə hücum zamanı 4 nəfər ölüb, 23 nəfər isə yaralanıb.

Odessa vilayətinə PUA hücumu nəticəsində yaşayış binalarının yaxınlığındakı avtomobil dayanacağında yanğın baş verib, 20 avtomobil yanıb.

Jitomir vilayətinə hücum zamanı 8, 12 və 17 yaşlarında 3 uşaq ölüb, daha 12 nəfər yaralanıb.

Ternopol vilayəti də “Kalibr” raketindən atəşə tutulub. Zərbə nəticəsində sənaye müəssisələrindən birinin binası zədələnib, 1000 kv.m sahədə yanğın baş verib.

Nikolayev vilayətinə PUA hücumu nəticəsində beşmərtəbəli yaşayış binasında yanğın baş verib. Ölü və yaralıların olduğu bildirilir.

Xmelnitski vilayətinə hücum nəticəsində mülki infrastruktura ciddi ziyan dəyib. Vilayət administrasiyasının rəhbəri Sergey Türinin sözlərinə görə, 4 nəfər həlak olub, 5 nəfər isə yaralanıb. Hücum nəticəsində 6 fərdi ev tamamilə dağılıb, 20-dən çox evə ziyan dəyib.

Çerniqov vilayətinə də hücum zamanı bir neçə yaşayış binası zədələnib.