İran xüsusi xidmət orqanlarının məxfi sənədlər arxivindən əldə etdiyi məlumatlar İslam Respublikasına yəhudi dövləti tərəfindən hücum edildiyi təqdirdə onun "gizli nüvə infrastrukturuna" cavab zərbələri endirməyə imkan verir.

Axar.az xəbər verir ki, bu barədə İranın Ali Milli Təhlükəsizlik Şurasının bəyanatında bildirilib.

"İranın keçirdiyi kəşfiyyat-əməliyyat tədbirləri nəticəsində əldə etdiyi məlumatlar iranlılara respublikanın nüvə infrastrukturuna İsrail tərəfindən ehtimal olunan hücuma qarşı durmağa və İsrailin gizli nüvə infrastrukturuna cavab zərbəsi endirməyə imkan verir", – bəyanatda vurğulanıb.

Qeyd edək ki, iyunun 7-də İran xüsusi xidmət orqanlarının İsrailin nüvə proqramına dair məxfi sənədlər arxivini əldə etdiyi məlumatı yayılıb.