İsveçrənin Tehrandakı səfiri, ABŞ-ın maraqlarını təmsil edən xanım Nadin Lozano İranın Xarici İşlər Nazirliyinə çağırılıb və ona bu ölkənin 3 nüvə obyektinə zərbələr endirilməsi ilə bağlı etiraz notası təqdim edilib.

Axar.az xəbər verir ki, bu barədə İranın “Tasnim” agentliyi məlumat yayıb.

Sənəddə qeyd olunur ki, ABŞ-ın hücumu BMT Nizamnaməsinin, eləcə də dinc məqsədlər üçün istifadə olunan nüvə obyektlərinə hücumları qadağan edən digər sənədlərin kobud şəkildə pozulmasıdır.

İran XİN-in Amerika departamentinin rəhbəri İsa Kamili İsveçrə səfiri ilə söhbətində vurğulayıb ki, ölkəsi BMT Nizamnaməsinə uyğun olaraq öz ərazisini müdafiə etmək, təhlükəsizliyini və milli maraqlarını təmin etmək hüququna malikdir.

Öz növbəsində Lozano notanı dərhal ABŞ hökumətinin nümayəndələrinə çatdırağını bildirib.

Qeyd edək ki, ABŞ 22 iyunda İranın nüvə obyektlərinə zərbələr endirib.