Kişilər ürək-damar xəstəlikləri üzrə risk zonasına qadınlardan xeyli əvvəl, təxminən 35 yaşdan etibarən daxil olurlar, kişilərin ürək sağlamlığı göstəriciləri kritik həddə qadınlarla müqayisədə orta hesabla yeddi il daha tez çatır.

Axar.az xəbər verir ki, bu barədə Amerika Ürək Assosiasiyasının jurnalı məlumat yayıb.

Ürək xəstəlikləri birdən-birə deyil, adətən 30–40 yaşlardan etibarən illər ərzində inkişaf edir. 34 il davam edən və 5 mindən çox insanı əhatə edən araşdırma göstərir ki, kişilərin 5 faizi 50 yaşında ürək-damar xəstəliyinə tutulduğu halda, qadınlar bu həddə 57 yaşında çatır.

50 yaşdan sonrakı 10 il ərzində xəstələnmə riski kişilərdə 6 faiz, qadınlarda isə 3 faizdir. Fərq yalnız klassik risk faktorları ilə izah olunmur, bioloji və sosial amillərin də rolu var. Mütəxəssislər risk qiymətləndirməsinin 40 deyil, 30 yaşdan başlanmasını və müntəzəm müayinələr, sağlam qidalanma və fiziki aktivliyi tövsiyə edirlər.