Qızılca vaxtında müalicə olunmadıqda ölümlə nəticələnən ağır infeksiyadır. Valideynlərə tövsiyyəm budur ki, uşaqları peyvənddən yayındırmasınlar. Uşaqları qorumalıyıq.

Axar.az xəbər verir ki, bu sözləri pediatr Vaqif Qarayev Ukraynada uşaqlar arasında yayılan və artıq bir uşağın ölümünə səbəb olan qızılca xəstəliyinin təhlükəsindən danışarkən deyib. Həkim-pediatr bildirib ki, yayılan belə epidemiyalar zamanı ölümün baş verməsinə səbəb peyvəndsizlikdir:

“Ukraynada qızılca ilə xəstələnmə halları çoxalıb. Hətta Kiyevdə epidemiya şəklini alıb. Səbəb, əlbəttə, uşaqların peyvənd olunmamasıdır. Hökumət əhalini vaksin ilə təmin edə bilmir. Ölkənin müharibə ilə bağlı hazırkı durumu kütləvi vaksinasiyanı çətinləşdirir. Nəticədə belə olur.

Qızılca vaxtında müalicə olunmadıqda ölümlə nəticələnən ağır infeksiyadır. Törədicinin yoluxdurma qabiliyyəti həddindən artıq yüksəkdir. Yəni tez bir zamanda epidemiya yaradır”.

V.Qarayev bildirib ki, bizdə də antivaksinator ordusu var:

“Göyöskürəklə xəstələnmə halları var və az da deyil. Hamısı da peyvəndsiz uşaqlardır. "Niyə peyvənd olunmayıb" sualına isə normal və tutarlı cavab eşitmirik. Ancaq peyvənd mütləqdir. Uşaqları qorumaq lazımdır”.

Qeyd edək ki, 2017-ci ilin sonlarından başlayaraq Ukraynada qızılca xəstəliyi yayılıb. Kütləvi halda yoluxma halı qeyd edilən ölkədə qızılcadan artıq 5 yaşlı bir qız uşağı dünyasını dəyişib.

Ukraynada 2015-ci ildə də bu xəstəlik yayılmış və kütləvi hal almışdı.