Bu gün həkimlərlə orqan transplantasiyası keçirmiş xəstələr arasında donorlarla “donor ol, həyat bəxş et” layihəsi çərçivəsində futbol oyunu keçirilib.

Axar.az xəbər verir ki, bunu jurnalistlərə açıqlamasında Səhiyyə Nazirliyinin Transplantologiya işinin təşkili üzrə Əlaqələndirmə Şurasının üzvü, Mərkəzi Neftçilər Xəstəxanasının “Cərrahiyyə və orqan transplantasiyası” bölməsinin müdiri Mircəlal Kazimi deyib.

“Azfar" stadionunda keçirilən oyunda Neftçilər Xəstəxanasının həkimləri qara ciyər və böyrək köçürülmüş pasiyentlərlə rəqib komandalarda oynayıblar. Oyun zamanı xəstələr həkimlərə xal hesabı ilə qalib gəlib”.

Mircəlal Kazimi qeyd edib ki, bəzən əməliyyat olunan xəstələr düşünür ki, yatağa bağlı qalacaq:

“Lakin bu belə deyil. Bugünkü oyunda 11 həkim, 16 xəstə, eyni zamanda donorlar da iştirak edib. Bu oyunun məqsədi də məhz bunu sübut etməkdir. Göstərmək istərdik ki, onlar hətta futbol oynaya bilirlər. Xəstələrimizdən ikisi 2 il əvvəl İspaniyada orqan köçürülmüş xəstələr arasında keçirilən oyuna qatılıb. Onların hər ikisi bürünc medalla vətənə qayıdıb. Oyunu izləyən xəstə yaxınları bildriblər ki, əməliyyatdan sonra onlar normal həyata qayıdıblar. Onlardan bir neçəsi əvvəllər xarici ölkələrə müayinələrə getsələr də öz ölkələrində şəfa tapıblar. Onların hər biri bu gün müəyyən sektorlarda çalışır”.