Hər hansı yeni bir virusun yayılma tendensiyası müşahidə olunmur.

Bu sözləri pediatr İlhamə Rüstəmbəyli son zamanlar məktəblilərdə müşahidə olunan qızdırma hallarının artması ilə bağlı Axar.az-a danışarkən deyib.

Onun sözlərinə görə, kütləvi hal almasa da, bu xəstəliyin hazırda narahatedici səviyyəyə qalxmasının səbəbi uşaqların xəstə halda məktəbə getməsidir:

"Uşaqlar qayıb almamaq üçün xəstə-xəstə dərsə gedir. Bu isə xəstəliyin yayılmasına gətirib çıxarır. Xəstə uşaqlar evdə izolyasiya olunmalıdır, kollektivə buraxılmamalıdır.

Həm də hava şəraitinin dəyişkən olması uşaqların xəstələnməsinə şərait yaradır".

İlhamə xanımın sözlərinə görə, bu kimi halların qarşısının alınması üçün uşaqların immunitet sistemini gücləndirən tədbirlər görülməlidir:

"Uşaqlara mayenin çox verilməsini tövsiyə edirəm. Çünki xəstəlik yaradan toksinlər maye ilə məhv edilir. Bununla yanaşı məktəblilərə vitaminlə zəngin qidalar vermək, açıq havada gəzmək lazımdır".