Ana səhifə Kult Sinema |
Qazaxıstan kinosunun qızıl fondunun yandırılması yalandır.
Bunu Kult.az-a açıqlamasında kinorejissor, xalq artisti Şeyx Əbdül Mahmudov deyib.
“Əvvəla, fond yandırılmayıb. İğtişaşlar üçün pul lazımdır. Maddiyyatsız heç nə olmur. And içib, Qurana əl basaram ki, Qazaxıstan kinosunun qızıl fondu əvvəlcə çapılıb-talanıb, sonra yandırılıb. Bu, oğruların qanunudur. Oğrular özlərindən sonra hər şeyi yandırıb arxalarında iz qoymurlar. Hər bir xalq öz tarixi ilə yaşayır. Ən əsas ideoloji təxribat bir millətin tarixi-mədəni, milli-mənəvi dəyərlərini məhv etməkdən ibarətdir. Hər zaman türkə maddi-mənəvi ziyan vurublar. Həmin maddi dəyərlərin hesabına bugünkü olaylar maliyyələşdirilir”.
Kinorejissor Tahir Tahiroviç isə saytımıza bildirib ki, tarix boyu iğtişaşlar zamanı bu cür hadisələr qaçılmaz olub:
“İnsanların bu cür qiyamlar zamanı gözləri bağlanır. Təkcə kino fondunu deyil, bankları da yağmalayır, heykəlləri dağıdırlar. Təbii ki, kinorejissor olaraq mənim üçün kino fondunun yandırılması ən faciəvi hadisədir. Kinematoqrafiyanın qızıl fondu bir millətin, dövlətin mədəniyyət, tarix fondudur. Bu tarixin, mədəniyyətin yandırılması, məhv edilməsi millətə sağalmaz yara vurur”.
P.S. “Qazaxfilm” iğtişaşlar zamanı qızıl fondun yandırılması ilə bağlı məlumatları bu dəqiqələrdə təkzib etdi.
Tarix
2022.01.07 / 16:47
|
Müəllif
Aytəkin Qardaşova
|