Rejissor Şon Hayderin “CODA: Kar valideynlərin uşağı” filmi “Ən yaxşı film” nominasiyası üzrə “Oskar” mükafatına layiq görülüb.

Kult.az xəbər verir ki, 20-dən çox nominasiya üzrə qalib müəyyənləşib.

Ən yaxşı film adı uğrunda Deni Vilnyovun “Dune”, Ceyn Kempionun “Köpəyin gücü”, Markus Qrinin “Kral Riçard”, Stiven Spilberqin “Vest Sayd hekayəsi”, Pol Tomas Anderssonun “Lakrik pizza”, yaponiyalı rejissor Ryusuke Xamaqutinin “Avtomobilimin sükanı arxasına əyləş”, Gilyermo Del Toronun “Dəhşət xiyabanı”, Adam Makkeyin “Yuxarı baxma” və Kennet Brananın “Belfast” filmləri mübarizə aparıb.

Ən çox mükafat alan film “Dune” olub. Film “Ən yaxşı montaj”, “Ən yaxşı orijinal partitura”, “Ən yaxşı istehsal dizaynı”, “Ən yaxşı səs”, “Ən yaxşı vizual effektlər”, “Ən yaxşı operator işi” kimi nominasiyalarla mükafatlandırılıb.

“Ən yaxşı kişi rolu” nominasiyasında isə “Oskar”ı “Kral Riçard” dramındakı roluna görə Uill Smit qazanıb.