Rejissor Asif Rüstəmovun "Axınla aşağı" bədii filmi beynəlxalq festivala dəvət alıb. Noyabrın 20-dən 28-dək Polşada keçiriləcək "Qolden anteaters" müsabiqəsində film nümayiş olunacaq.

Axar.az xəbər verir ki, müsabiqə proqramında 5 ölkədən 8 tammetrajlı bədii film yer alıb. "Axınla aşağı" filmi 2014-cü ildə Mədəniyyət və Turizm Nazirliyinin sifarişi ilə Cəfər Cabbarlı adına "Azərbaycanfilm" kinostudiyasında istehsal olunub.

Filmin ssenari müəllifləri Asif Rüstəmov və Otar Pertaxia, quruluşçu operatoru Ayxan Salar, quruluşçu rəssamı Rafiz İsmayılov, bəstəkarı Xəyyam Mirzəzadə, icraçı prodüseri Nadir Əliyev, prodüseri Müşfiq Hətəmovdur.

Filmdə baş rolları Namiq Ağayev, Mehriban Zəki, Aleksandra Andrejevska, Teymur Məmmədov və digərləri canlandırıblar.

Xatırladaq ki, film bu günlərdə Avstriyada keçirilən "LETS Kİ" beynəlxalq film festivalında mükafata layiq görülüb.