Qızıl Ayı mükafatlı türk rejissor Fatih Akın yeni filmin çəkilişinə başladığını elan edib.

Axar.az xəbər verir ki, sonuncu dəfə "Kəsik" filmini nümayiş etdirən rejissor bu dəfə Almaniyanın məşhur kitablarından olan Volfqanq Herndorfsun "Tşik" romanını ekranlaşdıracaq.

30 ölkədə çap edilən, 2 milyon tirajdan çox satılan romandan təsirlənən film 14 yaşlı Maykdan bəhs edir. Berlində kasıb həyat yaşayan, lakin varlı ailədə böyüyən Maykın anası yay tətilində reabilitasiya mərkəzinə aparılır. Atası gənc assistentini qəfil çıxan iş gəzintisinə aparacağını bəhanə edərək gözdən itir. Evdə tək qalan Mayk vaxtının çoxunu hovuzda keçirərkən məktəb yoldaşı rus miqrantı Tşik onun evinə oğurladığı maşınla gəlir. Birlikdə yola çıxan uşaqlar plansız şəkildə macəranın içinə atılırlar.

Mayk obrazını Tristan Göbel adlı aktyor canlandıracaq. Tşik obrazını oynayacaq aktyor isə əvvəllər aktyorluq təcrübəsi olmayan Anand Batbileq adlı gəncdir. Filmin prodüseri Marko Melitsdir. Filmin premyerası isə 15 sentyabr 2016-cı ildə olacaq.