"Keyxanım-Toppuş bacı" tandemi kimi tanıdığımız Ülviyyə və Tünzalə Əliyevalar yeni seriala çəkilir.

Azərbaycan Dövlət Musiqili Teatrından Axar.az-a verilən məlumata görə, yeni serial "Əntiqə rəfiqələr" adlanır. Serialda iki əsas qəhrəman var. Onlardan birini Ülviyyə Əliyeva, digərini isə əməkdar artisti Tünzalə Əliyeva canlandırır. Aktrisa Ülviyyə Əliyeva filmin maraqla qarşılanacağına inandığını deyib:

"Tünzalə Əliyeva ilə birlikdə ilk müstəqil işimizdir. Yəni birinci dəfədir ki, biz heç bir televiziyanın, prodakşnın, komandanın tərkibində olmadan, müstəqil şəkildə bir iş ərsəyə gətirməyə çalışmışıq. Elə "Əntiqə rəfiqələr"in ideyası da Tünzalə xanıma məxsusdur. Serialda əsasən iki rəfiqənin başına gələn maraqlı, gözlənilməz, komik situasiyalarla dolu əhvalatlar baş verir. Ümid edirik ki, bizim bu yeni işimiz də sevimli tamaşaçılarımızın rəğbətini qazanacaq".

Qeyd edək ki, ailə-məişət mövzusundan bəhs edən "Əntiqə rəfiqələr"in quruluşçu-rejissoru Xamis Ağcayevdir.