Nazirlər Avropanın sabit və təhlükəsiz Cənubi Qafqazda strateji marağının olduğunu vurğuladılar. Ermənistan-Azərbaycan sülh prosesindəki irəliləyiş region üçün real fürsətdir və Avropa Birliyi (AB) dəstəyini əhəmiyyətli dərəcədə artırır.

Axar.az APA-ya istinadən xəbər verir ki, bunu AB-nin xarici siyasət və təhlükəsizlik məsələləri üzrə ali nümayəndəsi Kaya Kallas Xarici İşlər Şurasının iclasından sonra keçirilən mətbuat konfransında deyib.

O, nazirlərin Ermənistan üçün yeni AB vətəndaş missiyası yaratmaq barədə razılığa gəldiklərini bildirib. Kallasın fikrincə bu, ölkələrin kütləvi dezinformasiya kampaniyalarına və kiberhücumlara qarşı dayanıqlığını gücləndirəcək.

“Ermənilər iyun ayında seçkilərə gedəndə öz gələcəklərini yalnız özləri seçməlidirlər. Həmçinin, İrəvanın may ayında dərinləşən tərəfdaşlığımızın sübutu olacaq ilk birgə sammitə ev sahibliyi etməsini səbirsizliklə gözləyirik”, - diplomat əlavə edib.

Kallas Azərbaycanın da enerji və bağlantı sahəsində mühüm tərəfdaş olaraq qaldığını vurğulayıb:

“Biz əlaqələrimizi dərinləşdirmək istəyirik və tezliklə yeni ikitərəfli əməkdaşlıq müqaviləsi üzrə danışıqları bərpa edəcəyik”.

Kallas Gürcüstanla əlaqələr haqda da fikirlərini bölüşüb:

“Gürcüstan demokratik geriləməni geri çevirmək istiqamətində heç bir əlamət göstərmir. Nazirlərin açıq mesajı belə idi ki, Gürcüstan kursunu dəyişməlidir. Əlbəttə ki, insan hüquqları dialoqunda həqiqi iştirak, kursu dəyişdirmək istədiklərinin göstəricisi olardı”.