Rusiyada saray çevrilişi mümkün deyil.

Axar.az xəbər verir ki, bunu Ukraynanın “Fraza” saytına müsahibəsində rusiyalı məşhur iqtisadçı Dmitri Nekrasov söyləyib.

“Son saray çevrilişi Xruşşovu devirəndə olub. O zaman hakimiyyət konstruksiyası kommunist ideologiyası üzərində idi. Həmin hakimiyyətin populyarlığını və legitimliyini məhz bu ideologiya təmin edirdi. İndiki hakimiyyətin populyarlıq və legitimliyini şəxsən Putin təmin edir. Əgər sistem ondan yaxasını qurtarsa, özü də dağılmağa başlayacaq. Rejim Putinin özü ilə transformasiya oluna bilər, amma daxildən sındırılıb, indiki vəziyyətdə qala bilməz. Bu şoku sistem qəbul edə bilməz. Rusiyanı idarə etmək üçün Kremli idarə etmək kifayət deyil”, – deyə o bildirib.

Rus iqtisadçının fikrincə, Ukraynadakı qondarma rejimlərin iqtisadiyyatları deqradisiyaya məruz qalır:

“Onların iqtisadi strukturu deqradasiya olur. Hər şey dağılacaq, insanlar buradan qaçacaqlar. Mən Dağlıq Qarabağda və Abxaziyada olmuşam. Burada görmüşəm ki, iqtisadi əlaqələrin kəsilməsi bu ərazilərin sürətlə boşaldılmasına səbəb olur. Ukraynada qondarma rejimlərin nəzarət etdiyi rayonlar 2014-cü ildən etibarən tənəzzülə başlayıblar. Bu, Ukraynanın blokadasından daha da güclənib. Bu ərazilər boşalacaq. Dağlıq Qarabağda olan şəhərlərdə əvvəllər 100 mindən çox insan yaşayırdı, amma indi heç kim qalmayıb. Bunlar hamısı çox kədərlidir. Donbas rayonları ilə bağlı Kremlin heç bir uğurlu gedişi olmayacaq. Bu ərazilərdəki insanları yaxşı heç nə gözləmir”.