Dünyaya demokratiya, xalqların öz müqəddəratını təyinetmə hüququ, söz, vicdan azadlığı və bu kimi dəyərləri aşılayan Fransa nə ölkəsində, nə də ölkə xaricində buna riayət edir. Rəsmi Paris ölkələrin beynəlxalq hüquqla tanınan ərazilərində fəaliyyət göstərən işğalçı və separatçı ünsürlərə dəstək verdiyi halda Avropadan minlərlə kilometr uzaqda olan sözdə torpağı Yeni Kaledoniyanın öz müqəddəratını təyin etməsinə izn vermir.

Bu sözləri Axar.az-a Qlobal və Regional Təhlükəsizlik Problemləri Mərkəzinin rəhbəri, politoloq Qabil Hüseynli Fransanın müstəmləkəsi Yeni Kaledoniyanın öz müstəqilliyini elan etməsi haqda danışarkən deyib.

O bildirib ki, Yeni Kaledoniya ötən əsrin sonlarından etibarən Fransa müstəmləkəsindən xilas olmaq istəyir:

“Yeni Kaledoniya bizim üçün hər nə qədər yad olsa da, bizimlə bənzər bir tarixə, hətta bayrağa sahib bir ərazidir. Yeni Kaledoniya Sakin okeanın cənub-şərqində yerləşən Melanezya adalar qrupunun parçası olan ərazidir. Fransanın çox bilinməyən, lakin dəfələrlə müstəqil olmaq üçün xalq referendumu keçirən, Avropa qitəsindən kənarda yerləşən ərazisidir.

1980-ci ildən başlayaraq yerli kanak xalqının başlatdığı müstəqillik hərəkatı nəticəsində 1984-cu ildə Kanak Milli Sosialist Qurtuluş Cəbhəsi rəsmən Kanaki ölkəsini qurduqlarını elan etdi. Lakin tarixi soyqırımlarla zəngin olan Fransa 1988-ci ildə bura öz ordusunu yeridərək kanak xalqının müstəqillik hərəkatını qanlı şəkildə yatırdı.

5 may 1998-ci ildə Noumea müqaviləsi ilə Yeni Kaledoniyaya geniş muxtariyyət verilib. Lakin bu, kanak xalqının müstəqillik əzmini qırmağa kifayət etməyib”.

Politoloqun sözlərinə görə, Fransa dəfələrlə Yeni Kaledoniyada müstəqillik üçün keçirilən xalq referendumuna müdaxilə edərək səsverməni saxtalaşdırıb:

“Lakin kanak xalqı 2022-ci ildə yenidən referendum keçirəcəyini açıqlayıb. Fransanın təkcə Yeni Kaledoniya deyil, Fransa Qayanası, Quadeloupe, Fransa Polinezyası kimi bir çox əraziləri də var. Rəsmi Paris bu gün Qafqazdakı “qardaşları”nın Azərbaycan torpaqları hesabına ikinci dəfə öz müqəddəratını təyin etməsi ilə maraqlanmaqdansa, yaxşı olardı Yeni Kaledoniyada yaşayan kanak xalqının müstəqillik çağırışına qulaq assın. Çünki biz müstəqilliyin nəyin bahasına alındığını bilirik. Əminik ki, bir gün Yeni Kaledoniyanın əsl sahibi olan kanak xalqı da öz müqəddəratını təyin edəcək”.