ABŞ-ın qəddar sanksiyaları bizim region ölkələri ilə əməkdaşlığımıza mane ola bilməz.

Axar.az xəbər verir ki, bunu İran Prezidenti İbrahim Rəisi Türkmənistan paytaxtı Aşqabadda İqtisadi Əməkdaşlıq Təşkilatının (İƏT) XV zirvə toplantısında deyib.

“İran Asiya ölkələri, xüsusilə Cənubi Asiya, Qərbi Asiya, Orta Asiya və Qafqazdakı qonşuları ilə iqtisadi əməkdaşlığa əhəmiyyət verir. İƏT də onlardan biridir. Biz bu təşkilatı qeyd-şərtsiz dəstəkləyirik. Prioritetimiz region ölkələri ilə əməkdaşlığı artırmaqdır. ABŞ-ın amansız sanksiyaları bölgə ölkələri ilə əməkdaşlığımıza mane ola bilməz. ABŞ nüvə sazişindən birtərəfli qaydada çıxması və ağır sanksiyaların tətbiqi ilə öz maraqlarının bizim regionun maraqları ilə eyni olmadığını göstərdi. Biz təkcə regionun iqtisadiyyatı güclü olan ölkələri deyilik. Eyni zamanda, biz islam kimi mədəniyyətə və bəşəriyyətin gələcəyinə işıq sala biləcək güclü mənəvi potensiala malik ölkələrik”, - Rəisi bildirib.

O qeyd edib ki, regional problemlər region ölkələri arasında həll edilməlidir. Qafqazda sabitlik və təhlükəsizliyin bərqərar olması ilə yeni iqtisadi əməkdaşlıq qurulacaq və bu, bölgənin inkişafına kömək edəcək.

Rəisinin sözlərinə görə, İqtisadi Əməkdaşlıq Təşkilatına üzv ölkələrin Qafqazda birgə fəaliyyət göstərməsi təşkilatın inkişafına töhfə verəcək:

"Köhnə ticarət yollarının inkişafı və yenilənməsi, region ölkələrinin bu məsələdə birgə fəaliyyət göstərməsi İƏT-ə də öz töhfəsini verəcək. Təbii ki, regionun sərhədlərinin dəyişdirilməsi sabitliyə səbəb olmayacaq, əksinə, münaqişə və böhrana səbəb olacaq".