Sazişin yekunlaşması çox yaxşı xəbərdir. Fikrimizcə, bu sənəd nə qədər tez imzalansa, hər iki ölkə, eləcə də bütün region üçün bir o qədər yaxşı olar. Biz regionda çoxlu qan, nifrət və müharibə gördük, buna son qoymağın vaxtıdır.

Axar.az Teleqraf-a istinadən xəbər verir ki, bunu İranın xarici işlər nazirinin müavini Məcid Taxt Rəvançı deyib.

“Hesab edirik ki, diqqəti təkcə Ermənistan və Azərbaycan deyil, həm də bütün region üçün fayda verəcək imkanlara yönəltməliyik. İran isə hər iki ölkənin dostu kimi Ermənistan və Azərbaycana əlini uzatmağa hazırdır və biz Ermənistanla Azərbaycan arasında münasibətlərin yaxşılaşmasına töhfə vermək üçün əlimizdən gələni əsirgəməyəcəyik. Biz gələcəyə diqqət yetirməliyik. Keçmişdə iki ölkə arasında problemlər olub, ancaq bu, hərbi yolla həlli ola bilməz; hərb həmişə müvəqqəti həll yoludur. Keçmiş keçmişdə qalıb. İndi hər iki xalqın münasibətləri normallaşdırmaq üçün hansı imkanların olduğunu görmə vaxtıdır", - o bildirib.

Nazir müavini vurğulayıb ki, xüsusən iqtisadi sahədə böyük potensial var, Ermənistanla Azərbaycan arasında sülh müqaviləsinin imzalanması halında bundan bütün region faydalanacaq.