Azərbaycan Dövlət Musiqili Teatrının rəhbərliyi gənclərin daha effektli yaradıcı fəaliyyət ilə məşğul olmasını təmin etmək üçün Yaradıcılıq Studiyası yaratmağa qərar verib.

Teatrın mətbuat xidmətindən Axar.az-a verilən məlumata görə, bu qərara teatr "Gənclər nə istəyir?" mövzusundakı toplantıda gənc əməkdaşların verdiyi bir sıra təklif və təşəbbüslərdən sonra gəlib.

Teatrın direktoru Əliqismət Lalayev hər zaman istedadlı gənclər üçün şərait yaratmağa, musiqili teatr sənəti sahəsində təhsil alan, xoreoqrafiya, vokal, aktyorluq və ifaçılıq sahəsində xüsusi bacarığı olan istedadlı gənclərə dəstək olmağa, səhnə formalarını tətbiq etmək, habelə gənclərin musiqili teatr janrındakı yaradıcılığına keyfiyyətli zəmin yaratmağa hazır olduğunu bildirib.

Qeyd edək ki, Azərbaycan Dövlət Musiqili Teatrının nəzdində yeni yaradılan Yaradıcılıq Studiyasının rəhbəri vəzifəsinə əməkdar incəsənət xadimi, rejissor Əsgər Əsgərov təyin olunub.