Musiqili Teatrın aktyoru Əzizağa Əzizov 55 yaşını qeyd edir.

Axar.az xəbər verir ki, əməkdar artist Əzizağa Əzizov 55 yaşının tamam olması münasibətilə onu təbrik edənlərə təşəkkürünü bildirib və bu yaxınlarda fəxri ada layiq görülməsindən danışıb:

"Təqribən 25 ildir ki, ad günümü təntənəsiz-təmtəraqsız – çox adi şəkildə evdə ailə üzvlərimlə birgə qeyd edirəm. Bu il də istisna olmayacaq. Dostlar, tanışlar, həmkarlarım, hətta tamaşaçılar zəng vurub təbrik edirlər. Hamınız sağ olun, var olun! Bildiyiniz kimi, bu yaxınlarda əməkdar artist fəxri adına layiq görüldüm. Sənətimi bu cür yüksək qiymətləndirdiyinə görə bir daha ölkə başçısına – Prezident İlham Əliyev cənablarına təşəkkür edirəm. Doğum günüm ərəfəsində mənə verilmiş bu yüksək qiyməti, fəxri adı 55 illik yubileyimlə bağlı ən böyük hədiyyə hesab edirəm".

Qeyd edək ki, Əzizov Əzizağa 20 oktyabr 1960-cı il tarixində anadan olub. Bir çox səhnə əsərlərində canlandırdığı unudulmaz obrazlarla yadda qalan Əzizağa Əzizov Azərbaycan tamaşaçısına daha çox "Aramızda qalsın" serialında oynadığı Əjdər rolu ilə tanışdır.