Bir neçə gün əvvəl vəfat edən əməkdar artisti Gülnar Salmanovanın xatirəsi Musiqili Teatrda yad edilib.

Teatrdan Axar.az verilən məlumata görə, Üzeyir Hacıbəylinin "Ər və arvad" tamaşasının budəfəki nümayişi mərhum aktrisanın əziz xatirəsinə həsr olunub. Tamaşada rolları xalq artistləri İlham Namiq Kamal, Fatma Mahmudova, əməkdar artistlər Nahidə Orucova, Əkbər Əlizadə, aktyorlar Möylə Mirzəliyev, Gülcahan Salamova və başqaları ifa ediblər.

Xatirə gecəsində çıxış edən xalq artisti Fatma Mahmudova Gülnar Salmanovanın hələ də yaşadığını bildirdi:

"Tamaşamızın budəfəki nümayişini sənət dostumuz Gülnar Salmanovanın xatirəsinə həsr etdik. Bu, bizi daha da yaxşı, daha da ilhamla oynamağa sövq etdi. Tamaşa boyu elə bilirdik ki, uzun illər səhnəni bölüşdüyümüz aktrisamızın ruhu da bizimlə burada – bu səhnədə, bu zaldadır".

Xatırladaq ki, əməkdar artist Gülnar Salmanova oktyabrın 24-də uzun sürən xəstəlikdən vəfat edib.