Azərbaycan Dövlət Akademik Milli Dram Teatrı noyabrın 19-dan 26-dək Belarusda keçiriləcək Gənclərin II Beynəlxalq Teatr Forumunda "İlahi oyun" tamaşası ilə iştirak edəcək.

Teatrın mətbuat xidmətindən Axar.az-a verilən məlumata görə, Mədəniyyət və Turizm Nazirliyinin dəstəyi, Azərbaycan Teatr Xadimləri İttifaqının təşkilatçılığı ilə baş tutacaq tədbir MDB və Baltikyanı ölkələri, Gürcüstanı əhatə edir. Tədbir Belarusun Yanka Kupala adına Milli Akademik Teatrında "İlahi oyun" tamaşası ilə açılacaq.

"Kitabi-Dədə Qorqud" dastanının "Dirsə xan oğlu Buğac" boyu əsasında hazırlanmış birhissəli etno-müziklın quruluşçu rejissoru Mikayıl Mikayılov, quruluşçu rəssamı Mustafa Mustafayevdir. Tamaşada əməkdar artistlər Vidadi Həsənov, Pərviz Məmmədrzayev, aktyorlar Nigar Güləhmədova və Novruz Novruzlu çıxış edirlər.

Qeyd edək ki, Gənclərin II Beynəlxalq Teatr Forumu Beynəlxalq Çexov Teatr Festivalı çərçivəsində gənc rejissorların işlərinə baxış məqsədi ilə təşkil olunur.